老一輩攏講：「冬節食烏正當時」、「鹹水烏勝過雞肉箍」。

咱Tâi-oan 掠烏魚的節氣，是 tī 逐年的冬至前後十天，著是烏魚對海水的溫度佮鹹度誠敏感，烏魚若要放卵，著一定愛去到適當溫度佮鹹度的海域， in 才會放卵。就是安呢，逐年立冬後，pak-pîng ê 海水開始反冷，原底生活 tī 中國大陸沿海的烏魚，因為緯度懸閣加上東北季風咧吹，致使海水的溫度降低，烏魚佇11月底抑是 12月初會歸陣做伙對中國大陸的沿岸泅下來，進入台灣海峽，經過澎湖來到台灣西南沿海放卵。

烏魚對討海人來講， in 攏講遮是黑金，烏魚的經濟價值誠懸，母的剖魚卵做烏魚子，佇台灣中南部沿海地區，現此時有袂少的漁民咧飼烏魚，上主要的是欲剖烏魚卵做烏魚子。烏魚子的營養價值誠懸，伊有豐富蛋白質、維生素、礦物質佮油質，一般攏是用烘來食，氣味真特殊，吃起來芳芳閣有特殊的口感，莫怪台灣人真興食，價數逐年攏真懸。

若按呢公的咧? 公的有烏魚鰾，價數嘛真好烏魚鰾有賀爾蒙佮維生素，閣有豐富的蛋白質佮油質，在寒人薑母用麻油煏煏予焦，烏魚鰾囥下去煎，煎予赤赤撒一寡米酒稍滾一下，起鼎進前抗一寡蒜仔尾，燒燒真好食。剖子取鰾了後的烏魚殼嘛賣有錢，烏魚殼的魚肉會凍做不少料理，攏誠好吃，上出名的有麻油烏魚，烏魚米粉佮蒜仔煮烏魚。

寫到遮，喙瀾giông-beh流下來。